هو انت ليه سكتك ..
جوه البلاد متحددة
وايدين بتنهش فى الحشا ..
جواك قوى
منتاش سوى..
أحلامك التايهة ف خيالك
والفضا ..
متبددة
والخطوة بعد الخطوة
ترجع للورا..
وبتنحنى ..
للخلف دور..
وهس هس ..
ملعبك أصبح خراب
مع أول السطر
ف كتابك ..
تنحفر كلمة عذاب
مسنودعلى ضهر الزمن ..
وعنيك ضباب
مش شايفة سر لانهزامك ..
منطوى
مجرووووووووووح قــوى
فى دماغك
الحزن اللى هزك واعتلاك..
عايز تجرب تندبح جواك ...
طلع لسانك بره منك ..
دلدله ..
وارسم عليه
معنى العبط..
مص الزلط..
واغزل من الريق المهاود ..
قنطارين م المرمطة..
جوه العيون الدبلانين..
فوق السكك متنطورين ..
أشلائك اللى اتبعترت ..
جوه السكك ..
اعمل خدودك قنطرة ..
لابن السفير ..
وابن الوزير ..
وابن الـ........
كل الخطط متدبرة ..
محتاج ترجع للزمن ..
حقه ف حياتك من سنين..
وتخرج القلب اللى أصبح كالسجين..
وتسد عين الشمس بكفوفك دهيه..
وتبوس بقلبك خد محبوبتك بهيه..
اتنفض قوم من سباتك مرتين ..
قبل ما تخسر حياتك..
تبقى برة المسرحية..
تبقى ...
برة ....
المسرحية,,,,,
